ବର୍ମିଂହାମ-: ଟିମ୍ ଇଣ୍ଡିଆର ଟେଷ୍ଟ ଅଧିନାୟକ ଶୁବମନ ଗିଲ୍ ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ର ପ୍ରଥମ ଇନିଂସରେ ଦ୍ୱିଶତକ ହାସଲ କରି ଅନେକ ଆଶ୍ଚର୍ଯ୍ୟଜନକ ରେକର୍ଡ ନିଜ ନାମରେ କରିଛନ୍ତି । ଗିଲ୍ ଟେଷ୍ଟରେ ଦ୍ୱିଶତକ ହାସଲ କରିଥିବା ପ୍ରଥମ ଏସୀୟ ଅଧିନାୟକ ହେବା ସହିତ ଇଂଲଣ୍ଡ ମାଟିରେ ଦ୍ୱିଶତକ ହାସଲ କରିଥିବା ପ୍ରଥମ ଭାରତୀୟ ଅଧିନାୟକ ହୋଇଛନ୍ତି । ୫୦୯ ମିନିଟ୍ ବ୍ୟାଟିଂ କରି ନିଜ ପାଳିରେ ୩୮୭ ବଲ୍ରେ ୩୦ଟି ଚୌକା ଓ ୩ ଛକା ମାରି ୨୬୯ ରନ୍ କରିଛନ୍ତି ଶୁବମନ ଗିଲ୍ । ଏଥିସହିତ ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟରେ ୫୮୭ ରନ୍ର ବଡ଼ ସ୍କୋର୍ ଛିଡ଼ା କରି ଭାରତକୁ ଦୃଢ଼ ସ୍ଥିତିରେ ପହଞ୍ଚାଇଛନ୍ତି । ଏଜବେଷ୍ଟନ ଗ୍ରାଉଣ୍ଡରେ ୧୫୦ରୁ ଅଧିକ ରନ କରିବା ସହ ସବୁଠୁ ବଡ଼ ପାଳି ଖେଳିଛନ୍ତି ଅଧିନାୟକ ଗିଲ୍ । ଏଥିସହିତ ପୂର୍ବତନ ଅଧିନାୟକ ବିରାଟ କୋହଲିଙ୍କ ରେକର୍ଡ ମଧ୍ୟ ଭାଙ୍ଗିଛନ୍ତି । ଟେଷ୍ଟ ଫର୍ମାଟରେ ଏହା ଗିଲଙ୍କ ସର୍ବଶ୍ରେଷ୍ଠ ପ୍ରଦର୍ଶନ । ଟେଷ୍ଟରେ ଶୁବମନ ଗିଲ୍ ଙ୍କ ଏହା ପ୍ରଥମ ଦ୍ୱିଶତକ । ଏହାପୂର୍ବରୁ ତାଙ୍କ ସର୍ବଶ୍ରେଷ୍ଠ ସ୍କୋର ଥିଲା ୧୪୭ ।
ପ୍ରଥମଦିନରେ ଶତକ ହାସଲ କରି ଅପରାଜିତ ଥିବା ଶୁଭମନ ଗିଲ୍ ଗୁରୁବାର ଦ୍ୱିତୀୟ ଦିନରେ ମାରାଥନ୍ ଇନିଂସ ଖେଳିଥିବା ବେଳେ ଦୁଇ ଅଲ୍ରାଉଣ୍ଡର ରବୀନ୍ଦ୍ର ଜାଡ଼େଜା ଓ ୱାଶିଂଟନ ସୁନ୍ଦର ତାଙ୍କ ସହ ଲମ୍ବା ଭାଗୀଦାରି କରିବାରୁ ଭାରତର ଏହି ବିଶାଳ ସ୍କୋର୍ ସମ୍ଭବ ହୋଇଛି । ତେବେ ଇଂଲଣ୍ଡକୁ ଦ୍ୱିତୀୟ ଦିନରେ ମାତ୍ର ୧୦୦ ମିନିଟ ବ୍ୟାଟିଂ କରିବାର ସୁଯୋଗ ମିଳିଥିଲା । କିନ୍ତୁ ଭାରତୀୟ ପେସ୍ ବୋଲର ଇଂଲଣ୍ଡକୁ ପ୍ରାରମ୍ଭିକ ଝଟ୍କା ଦେଇଥିଲେ । ଦ୍ୱିତୀୟ ଦିନ ଶେଷରେ ଇଂଲଣ୍ଡ ପ୍ରଥମ ଇନିଂସରେ ୩ ୱିକେଟ୍ ହରାଇ ୭୭ ରନ୍ କରିପାରିଛି । ୭ ୱିକେଟ୍ ବାକିଥାଇ ଇଂଲଣ୍ଡ ଏବେ ୫୧୦ ରନ୍ ପଛରେ ରହିଛି ।
Youngest Indian captain to score a double ton in Test cricket. Shubman Gill makes the road to royalty look effortless. 👑#SonySportsNetwork #GroundTumharaJeetHamari #ENGvIND #NayaIndia #DhaakadIndia #ExtraaaInnings pic.twitter.com/SRZ7qxYtmR
— Sony Sports Network (@SonySportsNetwk) July 3, 2025
