ନୂଆଦିଲ୍ଲୀ: ଆସନ୍ତା ଟି-ଟ୍ୱେଣ୍ଟି ବିଶ୍ୱକପ ପରେ ଅଧିନାୟକ ପଦ ଛାଡିବେ ଭାରତର ଷ୍ଟାର ଖେଳାଳୀ ବିରାଟ କୋହଲୀ । ଏନେଇ ନିଜେ ଟ୍ୱିଟ ଯୋଗେ ଘୋଷଣା କରିଛନ୍ତି ଚେଜ ମାଷ୍ଟର । ତେବେ ବିରାଟଙ୍କ ପରେ କିଏ ଭାରତୀୟ ଦଳର ଭାର ସମ୍ଭାଳିବ ସେ ନେଇ ଏବେ ଚର୍ଚ୍ଚା ଜୋର ଧରିଛି । ଆସନ୍ତା ଟି-ଟ୍ୱେଣ୍ଟି ବିଶ୍ୱକପ ପରେ ଭାରତର ଉପଅଧିନାୟକ ରୋହିତ ଶର୍ମା ହିଁ ଦଳର ଅଧିନାୟକ ଭାର ସମ୍ଭାଳିବେ ବୋଲି କୁହାଯାଉଛି ।
କିନ୍ତୁ ଏହି ସମୟରେ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କର ଏକ ବୟାନ ସମସ୍ତଙ୍କୁ ଚିନ୍ତା କରିବା ପାଇଁ ବାଧ୍ୟ କରିଛି । ଭାରତୀୟ କ୍ରିକେଟର ଭବିଷ୍ୟତକୁ ନଜରରେ ରଖି ବିରାଟ ଏହି ନିଷ୍ପତ୍ତି ନେଇଥିବା କହିଛନ୍ତି ବିସିସିଆଇ ଅଧ୍ୟକ୍ଷ । ଅର୍ଥାତ କେହି ଜଣେ ଯୁବ ଖେଳାଳୀଙ୍କୁ ଅଧିନାୟକ ପଦ ମିଳିବା ନେଇ ବୋଲି ଏହା ଆଙ୍ଗୁଳି ନିର୍ଦ୍ଦେଶ କରୁଛି । ତେବେ କିଏ ସେହି ଯୁବ କ୍ରିକେଟର ??
ଏହି ତାଲିକାରେ ଦୁଇ ଜଣ କ୍ରିକେଟରଙ୍କ ନାଁରେ ତାଲିକାର ଶୀର୍ଷରେ ରହିଛି । ସେମାନେ ହେଉଛନ୍ତି ଭାରତର ଅନ୍ୟତମ ଓପନର କେ.ଏଲ ରାହୁଲ ଏବଂ ୱିକେଟ କିପର ରିଷଭ ପନ୍ତ । ରାହୁଲଙ୍କର ବିଗତ କିଛି ବର୍ଷ ମଧ୍ୟରେ ଖୁବ ଭଲ ପ୍ରଦର୍ଶନ ରହିଥିବା ବେଳେ ଆଇପିଏଲରେ ମଧ୍ୟ ପଞ୍ଜାବ ଦଳର ଅଧିନାୟକ ପଦରେ ସେ ଖୁବ ଚମତ୍କାର ପ୍ରଦର୍ଶନ କରିଛନ୍ତି । ଯାହାଦ୍ୱାରା ତିନୋଟି ଯାକ ଫର୍ମାଟରେ ସେ ଦଳ ପାଇଁ ନିଜ ସ୍ଥାନ ପକ୍କା କରିଛନ୍ତି । ତେଣୁ ଯଦି ରୋହିତ ଅଧିନାୟକ ହେଉଛନ୍ତି ଉପଅଧିନାୟକ ପଦ ରାହୁଲଙ୍କୁ ମିଳିବାର ଯଥେଷ୍ଟ ସମ୍ଭାବନା ରହିଛି ।
ସେହିପରି ୱିକେଟ କିପର ରିଷଭ ପନ୍ତ ମଧ୍ୟ ଏହି ଦୌଡରେ ରାହୁଲଙ୍କ ସହ ରହିଛନ୍ତି । ଆଇପିଏଲରେ ଦିଲ୍ଲୀର ନିୟମିତ ଅଧିନାୟକ ଶ୍ରେୟସ ଆୟର ଆହତ ହେବା ପରେ ସେ ହିଁ ଦଳର ଅଧିନାୟକ ଭାର ସମ୍ଭାଳିଛନ୍ତି । ଆଇପିଏଲରେ ମିଳିଥିବା ଏହି ଗୁରୁଦାୟିତ୍ୱକୁ ସେ ଏବେ ପର୍ଯ୍ୟନ୍ତ ଖୁବ ସୁନ୍ଦର ଭାବେ ତୁଲାଇ ଆସିଛନ୍ତି । ତେଣୁ ତାଙ୍କୁ ଉପଅଧିନାୟକ କରିବା କଥା ଚିନ୍ତା କରିପାରେ ବିସିସିଆଇ । ବୟସ ଅନୁସାରେ ରାହୁଲ ଏବଂ ରିଷଭ ପନ୍ତ ଦୀର୍ଘ ସମୟ ପର୍ଯ୍ୟନ୍ତ ଅଧିନାୟକ ପଦରେ ରହି ପାରିବେ । ଯାହା ଉଭୟଙ୍କ ପାଇଁ ଏକ ବ୍ଲସ ପଏଣ୍ଟ ହୋଇଛି ।
