ତେନ୍ଦୁଲକରଙ୍କ କଥା ଆସିଲେ ଆମ ମନରେ ଆସେ କ୍ରିକେଟର ଭଗବାନ । ତାଙ୍କ ନାରେ ରହିଛି ବହୁ ବଡ ବଡ କିର୍ତ୍ତିମାନ ।ସେ ୩୦ ହଜାରରୁ ଅଧିକ ରନ୍ ଏବଂ କ୍ରିକେଟ୍ ଇତିହାସରେ ଶହେ ଶତକ ମାରିବାର ରେକର୍ଡ ଏବେ ବି ତାଙ୍କ ନାଁରେ ରହିଛି । ହେଲେ ଆଜି ଆମେ ଏମିତି ଜଣେ କ୍ରିକେଟରଙ୍କ କଥା କହିବୁ, ଯିଏ ଏକାକି ମାରିଛନ୍ତି ୧୯୯ ଶତକ ଏବଂ ୬୦ ହଜାରରୁ ଅଧିକ ରନ୍ ସଂଗ୍ରହ କରିଛନ୍ତି । କଥାଟି ସୁଣି ଆପଣଙ୍କୁ ଆଶ୍ଚର୍ୟ୍ୟ ଲାଗିପାରେ । ହେଲେ କଥାଟି କିନ୍ତୁ ପୂରାପୂରି ସତ ।
କ୍ରିକେଟ୍ ଜଗତରେ ଏଭଳି ଅଭଙ୍ଗା ରେକର୍ଡ କରିପାରିଥିବା କ୍ରିକେଟର ଜଣକ ହେଉଛନ୍ତି ଇଂଲଣ୍ଡର ଜ୍ୟାକ୍ ହବ୍ସ । ଯିଏକି ନିଜେ ୧୯୯ ଶତକ ମାରିବା ସହିତ ୬୧ ହଜାର ୭୬୦ ରନ୍ ସଂଗ୍ରହ କରିଛନ୍ତି । ତେବେ ଜ୍ୟାକ୍ ହବ୍ସ ହେଉଛନ୍ତି ଏମିତି ଜଣେ ଖେଳାଳି ଯିଏକି ଅନ୍ତର୍ଜାତୀୟ କ୍ରିକେଟ୍ ଅପେକ୍ଷା ଘରୋଇ କ୍ରିକେଟରେ ଧମାଲ ମଚାଇଛନ୍ତି । ଡାହାଣ ହାତୀ ଏହି ବ୍ୟାଟ୍ସମ୍ୟାନ୍ ନିଜ କ୍ରିକେଟ୍ କ୍ୟାରିୟର ଭିତରେ ୮୩୪ ପ୍ରଥମ ଶ୍ରେଣୀ ମ୍ୟାଚ୍ ଖେଳିଥିବାବେଳେ, ୫୦.୭୦ ଆଭରେଜରେ ୬୧ ହଜାର ୭୬୦ ରନ୍ କରିଛନ୍ତି । ଏହା ଭିତରେ ରହିଛି ୧୯୯ ଶତକ ଏବଂ ୨୭୩ଟି ଅର୍ଦ୍ଧଶତକ । ଖାଲି ସେତିକି ନୁହେଁ କ୍ରିକେଟ୍ କ୍ୟାରିୟରରେ ତାଙ୍କର ସର୍ବାଧିକ ସ୍କୋର ହେଉଛି ୩୧୬ ରନ୍ ।
ଇଂଲଣ୍ଡରେ ପ୍ରଥମ ଶ୍ରେଣୀ ମ୍ୟାଚ୍ ଖେଳୁଥିବା ଏହି କ୍ରିକେଟର ଜଣକ ୧୯୦୫ ମସିହାରେ ପ୍ରଥମ କରି ମ୍ୟାଚ୍ ଖେଳିଥିଲେ । ଏହାପରେ ଲଗାତାର ସେ ୨୯ ବର୍ଷ ଧରି କ୍ରିକେଟ୍ ଖେଳିବା ଜାରି ରଖିଥିଲେ ଆଉ ୧୯୩୪ରେ ଅବସର ଗ୍ରହଣ କରିଥିଲେ । କ୍ରିକେଟରୁ ଅବସର ନେବାବେଳକୁ ତାଙ୍କୁ ହେଇଥିଲା ୫୨ ବର୍ଷ । ତେବେ କ୍ରିକେଟ୍ ଇତିହାସରେ ସେ କରିଥିବା ଏହି ରେକର୍ଡ ଆଜି ପର୍ୟ୍ୟନ୍ତ କେହି ବି କ୍ରିକେଟର ଭାଙ୍ଗି ପାରିନାହାଁନ୍ତି
