ନୂଆଦିଲ୍ଲୀ: ଟି-୨୦ ବିଶ୍ୱକପରେ ଚମ୍ପିଆନର ଟାଇଟଲ ପାଇଛି ଅଷ୍ଟ୍ରେଲିଆ । ନ୍ୟୁଜିଲାଣ୍ଡକୁ ୮ ୱିକେଟରେ ପରାସ୍ତ କରି ପ୍ରଥମ ଥର ଟି-୨୦ ବିଶ୍ୱକପକୁ ନିଜ ନାମରେ କରିଛନ୍ତି । ଜବରଦସ୍ତ ପାରି ସହ ପ୍ଲେୟର ଅଫ ଦ ଟୁର୍ଣ୍ଣାମେଣ୍ଟ ପୁରସ୍କାର ପାଇଛନ୍ତି ଅଷ୍ଟ୍ରେଳିଆର ଷ୍ଟାର ଓପନର ଡାଭିଡ ୱାର୍ଣ୍ଣର । କିନ୍ତୁ ଏହାକୁ ନେଇ ହଠାତ ରାଗି ଯାଇଛନ୍ତି ପାକିସ୍ତାନର ପୂର୍ବତନ ଦ୍ରୁତ ବୋଲର ସୋଏବ ଅଖତର । ଏଣୁ ଟ୍ୱିଟରରେ ଏନେଇ ଅସନ୍ତୋଷ ବ୍ୟକ୍ତ କରିଛନ୍ତି ସୋଏବ । ବିଶ୍ୱକପ ଫାଇନାଲ ପରେ ଟ୍ୱିଟ କରିଛନ୍ତି ଯେ, ଏହି ପୁରସ୍କାରର ପ୍ରକୃତ ହକଦାର ପାକିସ୍ତାନର ଅଧିନାୟକ ବାବର ଆଜମ । କିନ୍ତୁ ଡାଭିଡ ୱାର୍ଣ୍ଣରଙ୍କୁ ଏହି ପୁରସ୍କାର ଦେବା ଭୁଲ ନିଷ୍ପତ୍ତି ବୋଲି ସେ ଟ୍ୱିଟ କରିଛନ୍ତି ।
Was really looking forward to see @babarazam258 becoming Man of the Tournament. Unfair decision for sure.
— Shoaib Akhtar (@shoaib100mph) November 14, 2021
ଟୁର୍ଣ୍ଣାମେଣ୍ଟରେ ଦମଦାର ପ୍ରଦର୍ଶନ କରି ପାକିସ୍ତାନୀ ବ୍ୟାଟ୍ସମ୍ୟାନ ବାବର ଆଜମ ୩୦୩ କରିଥିଲେ । ତେବେ ଡାଭିଡ ୱାର୍ଣ୍ଣର ମଧ୍ୟ ପଛରେ ନଥିଲେ । ଟୁର୍ଣ୍ଣାମେଣ୍ଟରେ ୨୮୯ ରନ କରି ଦ୍ୱିତୀୟ ସ୍ଥାନରେ ଥିଲେ ୱାର୍ଣ୍ଣର । କିନ୍ତୁ ଅଷ୍ଟ୍ରେଲିଆ ଚମ୍ପିଆନ ହୋଇଥିବାରୁ ୱାର୍ଣ୍ଣରଙ୍କୁ ଏହାର ଫାଇଦା ମିଳିଥିଲା । ବିଶ୍ୱକପରେ ସେ ଦମଦାର ପାଳି ଖେଳିଥିଲେ । ସେମି ପାଇନାଲ ଓ ଫାଇନାଲରେ ଓ୍ୱାର୍ଣ୍ଣରଙ୍କ ବ୍ୟାଟ୍ ଚାଲିଥିଲା । ଏହାସହ ସେ ଦଳକୁ ବିଜୟୀ କରିବାକୁ ମୁଖ୍ୟ ଭୂମିକା ଗ୍ରହଣ କରିଥିଲେ ।
ସୋଏବ ଫାଇନାଲ ମ୍ୟାଚ ଦେଖିବାକୁ ଷ୍ଟାଡିୟମରେ ଉପସ୍ଥିତ ଥିଲେ । ଟୁର୍ଣ୍ଣାମେଣ୍ଟର ପ୍ଲେୟର ଅଫ ଦ ଟୁର୍ଣ୍ଣାମେଣ୍ଟ ଭାବେ ସେ ବାବର ଆଜମଙ୍କୁ ଦେଖିବା ପାଇଁ ଖୁବ ଉତ୍ସୁକ ଥିଲେ । କିନ୍ତୁ ୱାର୍ଣ୍ଣରଙ୍କୁ ଏହି ପୁରସ୍କାର ମିଳିବା ପରେ ଅସନ୍ତୋଷ ବ୍ୟକ୍ତ କରିଛନ୍ତି ଅଖତର ।
