ହାଇଦ୍ରାବାଦ : ଭାରତରେ ଚାଲିଥିବା ଦିନିକିଆ ବିଶ୍ୱକପରେ ନ୍ୟୁଜିଲ୍ୟାଣ୍ଡର ବିଜୟ ଧାରା ଜାରି ରହିଛି । ଉଦଘାଟନୀ ମ୍ୟାଚରେ ନ୍ୟୁଜିଲ୍ୟାଣ୍ଡ ଡିଫେଣ୍ଡିଂ ଚାମ୍ପିୟନ ଇଂଲଣ୍ଡକୁ ହରାଇଥିବା ବେଳେ ଆଜି ଅପେକ୍ଷାକୃତ ନେଦରଲ୍ୟାଣ୍ଡ୍ସକୁ ମାତ୍ ଦେଇଛି । ହାଇଦ୍ରାବାଦରେ ଖେଳା ଯାଉଥିବା ଆଜିର ମ୍ୟାଚ୍ରେ ଟସ୍ ହାରି ପ୍ରଥମେ ବ୍ୟାଟିଂ କରୁଥିବା ନ୍ୟୁଜିଲ୍ୟାଣ୍ଡ ନିର୍ଦ୍ଧାରିତ ୫୦ ଓଭର୍ରେ ୭ ୱିକେଟ ହରାଇ ୩୨୨ ରନ କରିଥିଲା । ଏହାର ଜବାବରେ ନେଦରଲ୍ୟାଣ୍ଡ୍ସ ୪୭.୩ ଓଭର୍ରେ ସମସ୍ତ ୱିକେଟ ହରାଇ କେବଳ ୨୨୩ ରନ କରିବାକୁ ସକ୍ଷମ ହୋଇଛି । ଫଳରେ ଟମ ଲାଥମଙ୍କ ନ୍ୟୁଜିଲ୍ୟାଣ୍ଡ ୯୯ ରନରେ ମ୍ୟାଚ୍ ଜିତି ନେଇଛି । ଏହା ନ୍ୟୁଜିଲ୍ୟାଣ୍ଡର କ୍ରମାଗତ ଦ୍ୱିତୀୟ ବିଜୟ ହୋଇଥିବା ବେଳେ ଡଚ୍ ଟିମର ଦ୍ୱିତୀୟ ପରାଜୟ ପ୍ରଥମ ମ୍ୟାଚ୍ରେ ଦଳ ପାକିସ୍ତାନ ଠାରୁ ହାରିଥିଲା ।
ଟସ୍ ହାରି ବ୍ୟାଟିଂ କରୁଥିବା ନ୍ୟୁଜିଲ୍ୟାଣ୍ଡ ପ୍ରଥମ ୱିକେଟରେ ଡେଭୋନ କନୱେ ଓ ୱିଲ ୟଙ୍ଗ ୬୭ ରନ ଯୋଡ଼ିଥିଲେ । କନୱେ ୩୨ ରନ କରି ଆଉଟ ହୋଇଥିବା ବେଳେ ୟଙ୍ଗ ୭୦ ରନର ଇନିଂସ ଖେଳିଥିଲେ । ୩ନଂରେ ବ୍ୟାଟିଂ କରିଥିବା ରଚିନ ରବୀନ୍ଦ୍ର ୫୧ ବଲରେ ୫୧, ଡାର୍ଲି ମିଚେଲ ୪୭ ବଲରେ ୪୮, ଅଧିନାୟକ ଟମ ଲାଥମ ୪୬ ବଲରେ ୫୩, ଗ୍ଲେନ ଫିଲିପ୍ସ ୪, ମାର୍କ ଚାମ୍ପମାନ ୫ ରନ କରିଥିଲେ । ଶେଷ ଭାଗରେ ମିଚେଲ ସାଣ୍ଟନର ୧୭ ବଲରେ ବିସ୍ଫୋରକ ୩୬ ଓ ମ୍ୟାଟ ହେନରୀ ୪ ବଲରେ ୧୦ ରନ କରିବାରୁ କି ଟିମ ୫୦ ଓଭର୍ରେ ୭ ୱିକେଟ ହରାଇ ୩୨୨ ରନ କରିଥିଲା ।
ନେଦରଲ୍ୟାଣ୍ଡସ ପକ୍ଷରୁ ଆର୍ଯ୍ୟନ ଦତ୍ତ, ପଲ ଭାନ ମୀକେରେନ ଓ ରୋଲଫ ଭାନ ଡେର ମେରେ ଦୁଇଟି ଲେଖାଏ ସଫଳତା ପାଇଥିଲେ । ସେହିପରି ବାସ ଡେ ଲିଡେ ଗୋଟିଏ ୱିକେଟ ନେଇଥିଲେ । ୩୨୩ ରନର ଟାର୍ଗେଟ ପାଇଥିବା ଡଚ୍ ଟିମ ୨୧ ରନରେ ପ୍ରଥମ ୱିକେଟ ହରାଇଥିଲା ବିକ୍ରମଜିତ ସିଂହ ମାତ୍ର ୧୨ ରନ କରି ହେନରୀଙ୍କ ବଲରେ ଆଉଟ ହୋଇଥିଲେ । ଏହା ପରେ ମ୍ୟାକ୍ସ ଓ ଡାଉଡ ୧୬ ରନ କରି ପ୍ୟାଭିଲିୟନ ଫେରିଥିଲେ । ତାଙ୍କ ୱିକେଟ ସାଣ୍ଟନରଙ୍କ ଖାତାକୁ ଯାଇଥିଲା ।
