ଭୁବନେଶ୍ୱର(ସ୍ମୃତି ରଞ୍ଜନ): ରାଜଧାନୀ ଭୁବନେଶ୍ୱରର କଳିଙ୍ଗ ଷ୍ଟାଡିୟମ । ଆଜି କେବଳ ଓଡିଶା ନୁହେଁ, ସାରା ବିଶ୍ୱ ପାଇଁ ଏହା ଏବେ ରାଜ୍ୟର ଏକ ଅନ୍ୟତମ ପରିଚୟ । ବିଶ୍ୱ ଇତିହାସରେ ଏକ ଭିନ୍ନ ଛାପ ସୃଷ୍ଟି କରିଛି ଓଡିଶାର କଳିଙ୍ଗ ଷ୍ଟାଡିୟମ । ଆଜି ଏଠାରେ ଆନ୍ତର୍ଜାତୀୟ ହକି ଟୁର୍ଣ୍ଣାମେଣ୍ଟ ମଧ୍ୟ ଆୟୋଜିତ ହୋଇ ପାରୁଛି । ଆଉ ଏହି ଷ୍ଟାଡିୟମକୁ ବିଶ୍ୱ କ୍ରୀଡା ଜଗତରେ ସ୍ଥାନ ଦେବାରେ ମୁଖ୍ୟ ଭୂମିକା ତୁଲାଇଛନ୍ତି ଭାରତର ତଥା ଓଡିଶାର ଏକ ନମ୍ବର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ । ଯାହାପାଇଁ ଆଜି ଏଠାରେ ପ୍ରାକ୍ଟିସ କରି ଟୋକିଓ ଅଲିମ୍ପିକ୍ସ ପରି ପ୍ରତିଯୋଗିତାରେ ଭାଗ ନେଇ ଦେଶ ଏବଂ ରାଜ୍ୟର ଟେକ ରଖିଛନ୍ତି ଏହି ଖେଳାଳୀ । ଓଡିଶାର କେବଳ ପୁରୁଷ ନୁହେଁ ମହିଳା ଖେଳାଳୀମାନେ ମଧ୍ୟ ଦେଶକୁ ରିପ୍ରେଜେଣ୍ଟ କରିବା ପାଇଁ ପାଇଛନ୍ତି ଏକ ଜବରଦସ୍ତ ପ୍ଲାଟଫର୍ମ ।
ନବୀନ ବାବୁ ହେଉଛନ୍ତି ଜଣେ ଶାନ୍ତ ସ୍ୱଭାବର ମଣିଷ । କଥା କମ ଆଉ କାମରେ ବେଶୀ ବିଶ୍ୱାସ ରଖୁଥିବା ଜଣେ ଆଦର୍ଶ ମୁଖ୍ୟମନ୍ତ୍ରୀ ସେ । ଯାହାର ଜ୍ୱଳନ୍ତ ଉଦାହରଣ ହେଉଛି ହକି ଟିମ ପାଇଁ ତାଙ୍କର ସ୍ପନ୍ସରସିପ । ୨୦୧୮ ଭାରତୀୟ ହକି ଟିମରୁ ଅଫିସିଆଲ ସ୍ପନ୍ସର ସାହାରା କମ୍ପାନୀ ଓହରିଯିବା ପରେ ଏହାର ମଙ୍ଗ ଧରିଥିଲେ ନବୀନ । ଟିମ ପାଇଁ ସ୍ପନ୍ସରସିପ ଏକ ବଡ ଚିନ୍ତା ହୋଇ ଠିଆ ହୋଇଥିବା ବେଳେ ମୁଖ୍ୟମନ୍ତ୍ରୀ ଏହି ସମୟରେ ସଙ୍କଟମୋଚକ ପାଲଟିଥିଲେ । ୧୦୦ କୋଟି ଟଙ୍କାର ଏକ ବଡ ଏମାଉଣ୍ଟ ହକି ପାଇଁ ସେ ବିନିଯୋଗ କରିଥିଲେ । ଓଡିଶାକୁ ଏକ ଗରିବ ରାଜ୍ୟ ବୋଲି କହୁଥିବା ଅନ୍ୟ ରାଜ୍ୟ ପାଇଁ ଏହା ଥିଲା ଏକ ଶକ୍ତ ଜବାବ । ନବୀନବାବୁଙ୍କର ଏହି ପଦକ୍ଷେପରୁ ସ୍ପଷ୍ଟ ବାରି ହେଉଛି ଯେ ହକି ଏବଂ ଅନ୍ୟ ଖେଳ ପ୍ରତି ତାଙ୍କ ମନରେ କେତେ ରହିଛି ଦୁର୍ବଳତା । ୫ ବର୍ଷର ସ୍ପନ୍ସରସିପ ପାଇଁ ଓଡିଶାକୁ ଖର୍ଚ୍ଚ କରିବାକୁ ପଡୁଛି ୧୫୦ କୋଟି ଟଙ୍କା ଆମାଉଣ୍ଟ । ଏପରି କରିବାରେ ଭାରତ ଇତିହାସରେ ନବୀନ ହେଉଛନ୍ତି ପ୍ରଥମ ମନ୍ତ୍ରୀ ।
କିନ୍ତୁ ସବୁଠାରୁ ବଡ ସଫଳତା ଥିଲା ୨୦୧୯ ମସିହାର ହକି ବିଶ୍ୱକପ ଆୟୋଜନ । ସଫଳତାର ସହ ଏହି ଟୁର୍ଣ୍ଣାମେଣ୍ଟକୁ ଆୟୋଜନ କରି କ୍ରୀଡା ଇତିହାସରେ ଓଡିଶା, ଭୁବନେଶ୍ୱରର କଳିଙ୍ଗ ଷ୍ଟାଡିୟମ ଏବଂ ନିଜ ନାମ ସ୍ୱର୍ଣ୍ର ଅକ୍ଷରରେ ଲିପିବଦ୍ଧ କରାଇଛନ୍ତି ମାନ୍ୟବର ମୁଖ୍ୟମନ୍ତ୍ରୀ । ଏହାପରେ ପୁଣି ୨୦୨୩ରେ ମଧ୍ୟ ଏଠାରେ ହକି ବିଶ୍ୱକପ ଆୟୋଜନ ହେବା ପାଇଁ ସୂଚୀ ରହିଛି । ୨୦୧୯ରେ ଓଡିଶାର ଆୟୋଜନ ସଫଳତାକୁ ପ୍ରୋତ୍ସାହନ ଦେବା ପାଇଁ ଏଭଳି ଏକ ଉପହାର ପାଇଛି ଓଡିଶା । ଯାହା ରାଜ୍ୟ ଏବଂ ରାଜ୍ୟବାସୀଙ୍କ ପାଇଁ ଏକ ଗୌରବର ବିଷୟ । ଏହାପରେ ଟେକିଓ ଅଲିମ୍ପିକ୍ସରେ ଉଭୟ ପୁରୁଷ ଏବଂ ମହିଳା ହକି ଦଳରୁ ୪ ଜଣ ଓଡିଆ ଖେଳାଳୀ ସ୍ଥାନ ପାଇବାର ଶ୍ରେୟ ମଧ୍ୟ ପରୋକ୍ଷରେ ନବୀନ ବାବୁଙ୍କୁ ହିଁ ଯାଉଛି । ସେହିପରି ରାଜ୍ୟରେ କ୍ରୀଡାର ବିକାଶ ଏବଂ ଭିତ୍ତିଭୂମି ପାଇଁ ୮୯ଟି ଇଣ୍ଡୋର ଷ୍ଟାଡିୟମ ନିର୍ମାଣ କରିବା ପାଇଁ କ୍ୟାବିନେଟରେ ମୋଟ ୬୯୩.୩୫ କୋଟି ଟଙ୍କାର ଅନୁମୋଦନ ଉପରେ ମୋହର ମାରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କେବଳ ସେତିକି ନୁହେଁ ରାଜ୍ୟକୁ ଫେରିବା ପରେ ଆଜି ଓଡିଆ ଖେଳାଳୀ ମାନଙ୍କୁ କଳିଙ୍ଗ ଷ୍ଟାଡିୟମରେ ସେ ସମ୍ବର୍ଦ୍ଧିତ କରି ସମସ୍ତଙ୍କୁ ୨.୫ କୋଟି ଟଙ୍କା ଲେଖାଏଁ ପ୍ରଦାନ କରିଛନ୍ତି । ଏଥିସହ ପୁରୁଷ ହକି ଦଳରେ ସ୍ଥାନ ପାଇଥିବା ଦୁଇ ଖେଳାଳୀ ବିରେନ୍ଦ୍ର ଲାକ୍ରା ଏବଂ ଅମିତ ରୋହି ଦାସଙ୍କୁ ପୋଲିସ ବିଭାଗରେ ଡିଏସପି ପଦ ପାଇଁ ପ୍ରସ୍ତାବ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ।
ତେବେ ଏଥିରୁ ହକି ପ୍ରତି ନବୀନଙ୍କର କେେତେ ଯେ ପ୍ରେମ ତାହା ସ୍ପଷ୍ଟ ବାରି ହେଉଛି । ମୁଖ୍ୟମନ୍ତ୍ରୀଙ୍କର ଏହି ସବୁ ନିଷ୍ପତ୍ତି ଏବଂ କ୍ରୀଡା ପ୍ରତି ଅହେତୁକ ଦୁର୍ବଳତା ପାଇଁ ତାଙ୍କୁ କେବଳ ଓଡିଶା ନୁହେଁ ରାଜ୍ୟ ବାହାରୁ ମଧ୍ୟ ଶୁଭେଚ୍ଛାର ସୁଅ ଛୁଟିଛି । ସୋଶିଅଲ ମିଡିଆରେ ଏକ ନମ୍ବର ମୁଖ୍ୟମନ୍ତ୍ରୀ ଭାବେ ସେ ପରିଚିତ ଥିଲେ । କିନ୍ତୁ ବର୍ତ୍ତମାନ ତାଙ୍କର ,ହି କ୍ରୀଡା ଦୁର୍ବଳତା ତାଙ୍କୁ ଏକ ନୂଆ ପରିଚୟ ଦେଇଛି । ଭାରତର ହକି ଦଳ ତଥା ଓଡିଶାରେ କ୍ରୀଡାର ବିକାଶ ପାଇଁ କ୍ରୀଡା ଜଗତର ଆଉ ଜଣେ ବିଶ୍ୱକର୍ମା ବୋଲି ତାଙ୍କୁ ଆଖ୍ୟା ଦିଆସରିଛି । ଏଥିସହ ତାଙ୍କୁ ସ୍ପୋର୍ଟସ ସେନ୍ସେସନ ସିଏମ ବୋଲି ପରିଚୟ ସୃଷ୍ଟି କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
