କୋଲକାତା: ଆଜି ଭାରତ-ନ୍ୟୁଜିଲାଣ୍ଡ ଟି-୨୦ ସିରିଜର ତୃତୀୟ ତଥା ଅନ୍ତିମ ମ୍ୟାଚ । ଅଧିନାୟକତ୍ୱର ପ୍ରଥମ ସିରିଜରେ ହିଁ କ୍ଲିନ ସ୍ୱିପ ପରିସ୍ଥିତିରେ ରହିଛି ରୋହିତଙ୍କ ସେନା । ତିନି ମ୍ୟାଚ ବିଶିଷ୍ଟ ଏହି ସିରିଜରେ ଭାରତୀୟ ଦଳ ୨-୦ରେ ଆଗୁଆ ରହିଥିବା ବେଳେ ଆଜିର ମ୍ୟାଚରେ ବିଜୟ ଲାଭ କଲେ ଦଳ କ୍ଲିନ ସ୍ୱିପ କରିବ । ରାଞ୍ଚିରେ ହୋଇଥିବା ଦ୍ୱିତୀୟ ମ୍ୟାଚରୁ ସିରିଜ ନିଜ ନାମରେ କରି ସାରିଛି ଭାରତ । ଏବେ କେବଳ କ୍ଲିନ ସ୍ୱିପର ଅପେକ୍ଷା । ସେପଟେ ନ୍ୟୁଜିଲାଣ୍ଡ ସିରିଜ ହାରିବା ପରେ ଆଜିର ମ୍ୟାଚ ଜିତି ସମ୍ମାନ ରକ୍ଷା କରିବା ପାଇଁ ଚେଷ୍ଟା କରିବ ।
ଆଜିର ମ୍ୟାଚରେ ବିଜୟ ହାସଲ କରିପାରିଲେ ଉଭୟ ରୋହିତ ଏବଂ ରାହୁଲ ଦ୍ରାବିଡ ଏକ ନୂଆ କିର୍ତ୍ତୀମାନର ସ୍ଥପନା କରିପାରିବେ । ନୂତନ ଅଧିନାୟକ ଏବଂ ନୂଆ କୋଚ ଭାବରେ ପ୍ରଥମ ଶୃଙ୍ଖଳା କ୍ଲିନ ସ୍ୱିପ କରିବାର ରେକର୍ଡ କରିପାରନ୍ତି । ତେବେ ସିରିଜ ଜିତିବା ପରେ ଆଜି ଦଳରେ କିଛି ପରିବର୍ତ୍ତନ କରିପାରେ ଟିମ ଇଣ୍ଡିଆ । ଦ୍ରୁତ ବୋଲର ଦୀପକ ଚହର କିମ୍ବା ଭୁବନେଶ୍ୱରଙ୍କ ସ୍ଥାନରେ ଅଭେଶ ଖାନଙ୍କୁ ଚୂଡାନ୍ତ ଏକାଦଶରେ ସ୍ଥାନ ମିଳିପାରେ । ସେହିପରି ଅଶ୍ୱିନ କିମ୍ବା ଅକ୍ଷର ପଟେଲଙ୍କୁ ବିଶ୍ରାମ ଦିଆଯାଇ ୟୁଜଭେନ୍ଦ୍ର ଚହଲ ଏବଂ ୱିକେଟ କିପର ଋଷଭ ପନ୍ତଙ୍କ ଇଶାନ କିଶାନଙ୍କୁ ଦଳରେ ଖେଳାଯାଇପାରେ । ଆଇପିଏଲରେ ଦମଦାର ପ୍ରଦର୍ଶନ କରିଥିବା ରୁତୁରାଜ ଗାଏକ୍ୱାଡଙ୍କୁ ମଧ୍ୟରେ ଆଜି ମ୍ୟାଚ ପାଇଁ ଡାକରା ମିଳିବ ବୋଲି ଚର୍ଚ୍ଚା ହେଉଛି । ତେବେ ଏହିସବୁ ପରିବର୍ତ୍ତନ କୋଲକାତାର ଇଡେନ ଗାର୍ଡେନ୍ସର ପିଚ ଏବଂ ପରିବେଶ ଉପରେ ନିର୍ଭର କରିବ । ଜୟପୁରରେ ଯୁବ ବୋଲର ହର୍ଷଲ ପଟେଲ ପଦାର୍ପଣରେ ମ୍ୟାଚ୍ ର ଶ୍ରେଷ୍ଠ ଖେଳାଳି ପୁରସ୍କାର ଲାଭ କରିବା ପରେ ଦଳୀୟ ପରିଚାଳକ ତାଙ୍କ ଉପରେ ପୁନର୍ବାର ଆସ୍ଥା ପ୍ରକଟ କରିପାରନ୍ତି। ନ୍ୟୁଜିଲାଣ୍ଡ ତାର ସଂଘର୍ଷରତ ମଧ୍ୟକ୍ରମରେ କିଛିଟା ଅଦଳ ବଦଳ କରିପାରେ।
