୧୫ବର୍ଷ ପରେ ଏସିଆ କପ୍ ଆୟୋଜନ କରିବ ପାକିସ୍ତାନ । ମ୍ୟାଚ ଆରମ୍ଭ ହେବା ପୂର୍ବରୁ ପାକିସ୍ତାନକୁ ବଡ ଝଟକା ।ଆୟୋଜକ ପାକିସ୍ତାନରେ ହେବ ମାତ୍ର ୪ଟି ମ୍ୟାଚ୍ । ବାକି ୯ଟି ମ୍ୟାଚ୍ ଶ୍ରୀଲଙ୍କାରେ ହେବ ବୋଲି ଘୋଷଣା କରିଛି ଏସିଆନ୍ କ୍ରିକେଟ କାଉନସିଲ । ଏସିଆ କପର ଭେନ୍ୟୁକୁ ନେଇ ପୂର୍ବରୁ ଅନେକ ବିବାଦ ଦେଖାଯାଇଥିବା ବେଳେ ଏସିଆନ୍ କ୍ରିକେଟ କାଉନସିଲ୍ ପକ୍ଷରୁ ତାରିଖ ଘୋଷଣା ହୋଇଛି । ୩୧ ଅଗଷ୍ଟରୁ ୧୭ ସେପ୍ଟେମ୍ବର ମଧ୍ୟରେ ହେବ ଟୁର୍ଣ୍ଣାମେଣ୍ଟ । ଚଳିତ ବର୍ଷ ହାଇବ୍ରିଡ ମଡେଲରେ ଖେଳାଯିବ ମ୍ୟାଚ୍ । ପାକିସ୍ତାନ ଏବଂ ଶ୍ରୀଲଙ୍କାରେ ହେବ ମ୍ୟାଚ । ଭାଗ ନେବେ ଭାରତ, ପାକିସ୍ତାନ, ଶ୍ରୀଲଙ୍କା, ବାଂଲାଦେଶ, ଆଫଗାନିସ୍ତାନ ଏବଂ ନେପାଳ । ୧୩ ଟି ମ୍ୟାଚ୍ରୁ ପାକିସ୍ତାନ ୪ଟି ମ୍ୟାଚ୍ର ଆୟୋଜନ କରିବ ଏବଂ ଶ୍ରୀଲଙ୍କାରେ ୯ଟି ଖେଳାଯିବ ।
ହାଇବ୍ରିଡ ମଡେଲ କାରଣରୁ ୧୫ ବର୍ଷ ପରେ ଏସିଆ କପ୍ ଆୟୋଜନ କରିବାର ସୌଭାଗ୍ୟ ପାଇଛି ପାକିସ୍ତାନ । ପୂର୍ବରୁ ପାକିସ୍ତାନ ଏସିଆ କପ୍ ଆୟୋଜନ କରିବା ନେଇ ଅନୁମତି ପାଇଥିଲା । କିନ୍ତୁ ଟିମ୍ ଇଣ୍ତିଆ ପାକିସ୍ତାନ ଖେଳିବାକୁ ଯିବ ନାହିଁ ବୋଲି BCCI ସ୍ପଷ୍ଟ କରିଥିଲା । ଏହାପରେ ଏସିଆ କପ୍କୁ ହାଇବ୍ରିଡ ମଡେଲରେ ଆୟୋଜନ କରାଯିବ ବୋଲି ACC ପକ୍ଷରୁ ନିଷ୍ପତ୍ତି ନିଆଯାଇଥିଲା । ପ୍ରତ୍ୟେକ ଗ୍ରୁପରୁ ଦୁଇଟି ଟିମ୍ ସୁପର ଫୋର୍ ରାଉଣ୍ଡରେ ପହଞ୍ଚିବ । ୬ଟି ଟିମ୍କୁ ଦୁଇଟି ଗ୍ରୁପରେ ବିଭକ୍ତ କରାଯିବ । ସୁପର ଫୋର ରାଉଣ୍ଡରେ ଶୀର୍ଷରେ ଥିବା ଦୁଇ ଟିମ୍ ମଧ୍ୟରେ ହେବ ଫାଇନାଲ ମୁକାବିଲା ।
