ଭୁବନେଶ୍ୱର : ଭାରତୀୟ କ୍ରିକେଟ୍ ଦଳ ଅକ୍ଚୋବର ୮ ତାରିଖରୁ ଅଷ୍ଟ୍ରେଲିଆ ବିପକ୍ଷ ମ୍ୟାଚରୁ ନିଜର ବିଶ୍ୱକପ୍ ଯାତ୍ରା ଆରମ୍ଭ କରିବ । ଏଥି ସହିତ ଭାରତ ପ୍ରଥମ ଥର ପାଇଁ ଏସୀୟ କ୍ରୀଡ଼ାରେ ଅଂଶ ଗ୍ରହଣ କରିବାକୁ ଯାଉଛି । ତେବେ ନିକଟରେ ବିସିସିଆଇ ଏସୀୟାନ ଗେମ୍ସ ପାଇଁ ତାର ଦଳ ଘୋଷଣା କରିଛି । କିନ୍ତୁ ଏହି ଦଳରେ ଆଶା କରାଯାଉଥିବା କିଛି ଖେଳାଳିଙ୍କୁ ସ୍ଥାନ ମିଳି ନାହିଁ । ତେବେ ଏପରି ପରିସ୍ଥିତିରେ ଆଗାମୀ ବିଶ୍ବକପରେ ଏହି ଖେଳାଳିଙ୍କ ନାମ ଆସିବା ନେଇ ଆଶଙ୍କା କରାଯାଉଛି ।
ଏସୀୟ କ୍ରୀଡାରେ ଶିଖର ଧାୱନ ଅଧିନାୟକ ହେବା ନିଶ୍ଚିତ ଥିଲା କିନ୍ତୁ ତାଙ୍କ ସ୍ଥାନରେ ରୁତୁରାଜ ଗାଏକ୍ୱାଡ଼ ଏହି ଦଳର ଅଧିନାୟକ ଘୋଷଣା କରିଛି ବିସିସିଆଇ । ସେହିପରି ଯଦି ଦେଖାଯାଏ ବର୍ତ୍ତମାନ ଭାରତୀୟ ଦଳର ମିଡିଲ ଅର୍ଡରରେ ଖେଳୁଥିବା ଲୋକେସ ରାହୁଲ ଓ ଶ୍ରେୟସ ଆୟର ଆହତ ଅଛନ୍ତି । ଇସନ କିଶନଙ୍କ ପ୍ରର୍ଦଶନ ମଧ୍ୟ ଆଖି ଦୃଷ୍ଟିଆ ରହିନାହିଁ । ଦିନିକିଆରେ ଅଧିନାୟକ ରୋହିତ ଶର୍ମାଙ୍କ ସହିତ ଯୁବ ଶୁଭମନ ଗିଲ୍ ଓପନିଂ ଭାର ସମ୍ଭାଳିବେ , ତେବେ ଏପରି ପରିସ୍ଥିତିରେ ବ୍ୟାକ-ଅପ୍ ଓପନର ଭାବେ ଶିଖର ଧାୱନଙ୍କୁ ସ୍ଥାନ ମିଳିବାର ସୁଯୋଗ ରହିଛି ।
ପୂର୍ବରୁ ଆଇସିସି ଟୁର୍ଣ୍ଣାମେଣ୍ଟରେ ଶିଖରଙ୍କ ପ୍ରଦର୍ଶନ ଭଲ ମଧ୍ଯ ରହିଛି । ସେହିପରି ଇସାନ କିଶନଙ୍କ ପାଇଁ ମଧ୍ୟ ବିଶ୍ବକପରେ ସ୍ଥାନ ପାଇବାରେ ସୁଯୋଗ ରହିଛି । କାହିଁକି ନା ରିଶବ ପନ୍ଥ ଏବଂ ଶ୍ରେୟସ ଆୟର ଏପର୍ଯ୍ୟନ୍ତ ପୂର୍ଣ୍ଣ ରୂପରେ ଫିଟ୍ ହୋଇନାହାନ୍ତି । ଯାହା ଫଳରେ ଇସାନଙ୍କ ପାଇଁ ସେହି ସ୍ଥାନରେ ଖେଳିବା ସମ୍ଭବ ହୋଇପାରେ । କିଶନ ଦିନିକିଆରେ ୧୪ ଟି ମ୍ୟାଚରେ ମୋଟ ୫୧୦ ରନ କରିଛନ୍ତି । ଯେଉଁଥିରେ ବାଂଲାଦେଶ ବିପକ୍ଷ ଦିନିକିଆରେ ଏକ ଦ୍ଶିଶତକ ସାମିଲ ରହିଛି । ସେହିପରି ଯଦି ବୋଲିଂ ଉପରେ ନଜର ପକାଇବା ତେବେ ସିରାଜ ଏବଂ ଶାମି ଏହାର ନେତୃତ୍ବ ନେବେ । କିନ୍ତୁ ଯଦି ଯଶପ୍ରିତ୍ ବୁମରାହ ଆହତ କାରଣରୁ ବିଶ୍ବକପରୁ ବାଦ୍ ପଡିଲେ ତେବେ ତାଙ୍କ ସ୍ଥାନରେ ଉମରାନ ମଲିକଙ୍କ ନାମ ଦିଆଯାଇପାରେ । ତାଙ୍କୁ ୱେଷ୍ଚଇଣ୍ଡିଜ ଶୃଙ୍ଖଳାରେ ଦିନିକିଆ ଓ ଟି – ୨୦ ପାଇଁ ଦଳରେ ସାମିଲ କରାଯାଇଛି । ଉମରାନ ଦିନିକିଆରେ ୮ ଟି ମ୍ୟାଚ ଖେଳି ୧୩ ୱିକେଟ୍ ନିଜ ନାମରେ କରିଛନ୍ତି । ତେବେ ଦେଖିବାର ରହିଲା ଏହି ୩ ଖେଳାଳିଙ୍କ ଭିତରୁ କାହାକୁ ବିଶକପ୍ ଡାକରା ଆସୁଛି।
